Add

Add

0

पुणे (प्रतिनिधी):-स्मार्ट सिटी योजनेच्या वर्षपूर्ती समारंभाची पुणेकरांमध्ये प्रचंड उत्सुकता असून यामध्ये राजकीय पक्ष, सामाजिक संघटना, स्वयंसेवी संस्थांचे प्रतिनिधी, विद्यार्थी, महिला अशा विविध स्तरातील सुमारे पाच ते साडेपाच हजार नागरिकांना निमंत्रित करण्यात आले आहे. तसेच, शहरातील नागरिकांसाठी क्षेत्रीय कार्यालयांच्या 40 ठिकाणी स्क्रीन लावून कार्यक्रमाचे थेट प्रक्षेपण केले जाणार आहे, अशी माहिती पुणे स्मार्ट सिटी डेव्हलपमेंट कार्पोरेशनच्या मुख्य कार्यकारी अधिकारी आणि महापालिकेच्या अतिरिक्त आयुक्त प्रेरणा देशभ्रतार यांनी पत्रकार परिषदेत दिली.
केंद्र सरकारच्या स्मार्ट सिटी योजनेचा वर्षपूर्ती समारंभ शनिवारी 4 वाजता बालेवाडी येथे होणार आहे. या कार्यक्रमासाठी राजकीय पक्षांचे पदाधिकारी, खासदार, आमदार, मंत्री, सामाजिक संघटना, स्वयंसेवी संस्थांचे प्रतिनिधींना निमंत्रण देण्यात आले आहे. तसेच, विद्यार्थी आणि महिलांदेखील निमंत्रित करण्यात आल्याचे देशभ्रतार यांनी सांगितले. यावेळी पोलीस उपायुक्त डॉ. बसवराज तेली, महापालिकेचे उपायुक्त अनिल पवार उपस्थित होते. कार्यक्रम केवळ उपस्थितांसाठी असणार आहे. त्यामुळे निमंत्रण पत्रिका असलेले नागरिक आणि मान्यवर यांनाच कार्यक्रमाच्या ठिकाणी प्रवेश मिळणार आहे. निमंत्रण पत्रिकेवरील बारकोड तपासून नागरिकांना कार्यक्रमाच्या ठिकाणी सोडण्यात येणार आहे, असेही देशभ्रतार यांनी सांगितले.
मोबाईल आणू नयेत
कार्यक्रमाला उपस्थित असणारे नागरिक, मान्यवर, प्रसारमाध्यमांचे प्रतिनिधी यांना मोबाईल, इलेक्टॉनिक वस्तू, बॅग आदी वस्तू सोबत घेता येणार नाहीत, अशी माहिती डॉ. बसवराज तेली यांनी दिली. कार्यक्रमाच्या अगोदर एक तास कार्यक्रमाच्या ठिकाणी नागरिकांना सोडण्यात येणार आहे. कार्यक्रमाच्या ठिकाणापासून एक किलोमीटर अंतरावर वाहन पार्किंगची व्यवस्था करण्यात आली असल्याचेही तेली यांनी सांगितले.

Post a Comment

 
Top