Add

Add

0

325 ग्रामपंचायतींमध्ये ‘ई-ग्राम’ सॉफ्टवेअर उपलब्ध

पुणे (प्रतिनिधी):- जिल्ह्यातील सुमारे 325 ग्रामपंचायतींमध्ये ‘ई-ग्राम’ नामक सॉफ्टवेअर बसविण्यात आले आहे. त्यामुळे आता 33 प्रकारचे दाखले घरबसल्या उपलब्ध होणार आहेत.
‘जिल्ह्यात 1407 ग्रामपंचायती आहेत. त्यापैकी 880 ग्रामपंचायतींमध्ये आपले सरकार सेवा केंद्र आहे. या केंद्रांमध्ये दाखले देण्यासाठी संग्राम नावाचे सॉफ्टवेअर बसविण्यात आले होते. त्याद्वारे 28 प्रकारचे दाखले देण्यात येत होते. आता त्याऐवजी नव्याने ई-ग्राम सॉफ्टवेअर बसविण्यात आले आहे. 325 ग्रामपंचायतींमध्ये ते बसविण्यात आले असून, त्याचा ग्रामीण रहिवाशांना लाभ होणार आहे. आता 28 ऐवजी 33 प्रकारचे दाखले नागरिकांना उपलब्ध होणार आहे,’ अशी माहिती जिल्हा परिषदेच्या पंचायत विभागाचे उपमुख्य कार्यकारी अधिकारी संदीप कोहिनकर यांनी दिल
‘ई-ग्राम’ सॉफ्टवेअरमुळे अर्जदार व्यक्तीचे नाव, कागदपत्रे अपलोड केल्यास दाखले मिळणार आहेत. त्यासाठी नोंदणी करावी लागणार आहे, तसेच ‘लॉग इन’ करावे लागेल. राज्यातील सर्व ग्रामपंचायतीमध्ये हे सॉफ्टवेअर कार्यान्वित केले जाणार आहे. नव्या सॉफ्टवेअरद्वारे दाखल्याबरोबर विविध प्रकारच्या ग्रामपंचायतींमधील कामकाजातील नोंदीही करता येणार आहेत. त्यामध्ये व्यक्ती करपात्र आहे का,गावात किती वृक्ष आहेत, लोकसंख्या, ग्रामपंचायतीतील कर्मचारी संख्या आदी नोंदी ठेवाव्या लागतात. या सॉफ्टवेअरमध्ये त्यांचा समावेश आहे. त्यामुळे याची माहिती नागरिकांना देखील सहज उपलब्ध होणार आहे.
रहिवासी दाखला, दारिद्र्य रेषेखालील दाखले, जन्म-मृत्यू दाखला, विवाह नोंदणी दाखला, शौचालय वापरत असल्याचा दाखला, ज्येष्ठ नागरिकांचा दाखला, विधवा असल्याचा दाखला, ग्रामपंचायतीचे येणे नसल्याचा दाखला, हयातीचा दाखला, 8-अ उतारा, विभक्त कुटुंब दाखला, निराधार दाखला अशा प्रकारचे दाखले ई- ग्राम या सॉफ्टवेअरद्वारे उपलब्ध होणार आहेत, अशीही माहिती कोहिनकर यांनी दिली.  

Post a Comment

 
Top