Add

Add

0
 पिंपरी(प्रतिनिधी):-पवना धरण ते दापोडी या पवना नदीच्या उगम ते संगम असलेले पात्र जलपर्णीमुक्त करण्याचा ध्यास सामाजिक संघटना आणि नागरिकांनी घेतला आहे. त्याअंतर्गत ‘माझी नदी, माझीजबाबदारी’ उपक्रमातील सहभाग वाढत आहे.

दर रविवारी नागरिकांनी एकत्र येऊन पवना नदी जलपर्णीमुक्त आणि स्वच्छ करण्याचा संकल्प सोडला आहे. त्याअंतर्गत सलग दुसऱ्या रविवारी रोटरी क्लब वाल्हेकरवाडीसह 22संघटना, बचतगट यांनी उपक्रमात सहभाग नोंदविला. त्यामध्ये नगरसेवक मोरेश्वर भोंडवे,सचिन चिंचवडे,शेखर चिंचवडे, संजय कुलकर्णी, प्रदीप वाल्हेकर यांनी भाग घेतला. प्रवीण लडकत, राजीव भावसार,सोमनाथ मुसुडगे यांनी मार्गदर्शन केले.गेल्या काही दिवसांत नदीच्या पात्रातून 15 ट्रक कचरा आणि जलपर्णी काढण्यात आली.
लोकप्रतिनिधींसह नागरिक,सामाजिक संस्था, बचतगट, खासगी कंपन्यानीही पुढाकार घेऊन आर्थिक मदतीची तयारी दर्शविली आहे. यामध्ये भावसार व्हिजन इंडिया, पीसीसीएफ,शिवप्रतिष्ठान हिंदुस्थान, बजरंग दल, पवना मिशन, निसर्ग हाउसिंग सोसायटी यांनी प्रत्यक्ष सहभाग नोंदविला.कल्याणी एन्टरप्रायजेस, ज्ञान प्रबोधिनी पालक संघटना यांनी आर्थिक मदत, साई रेडिमिक्स काँक्रीट यांनी अवजारे, एस. पी.वायर्स यांचे पथक आणि वाहतुकीची सोय, रानजाई संस्थेतर्फे मनुष्यबळाची सोय उपलब्ध करून देण्यात आली. सर्वांच्या मदतीने पुढील पाच रविवार हा उपक्रम चालू ठेवणार असल्याचे स्पष्ट करण्यात आले.
जलपर्णीवर आळा...
नोव्हेंबर आणि डिसेंबरच्या कालावधीत जलपर्णी वाढण्याचा आणि नदीपात्रात पसरण्याचा धोका असतो. त्यामुळे हे काम युद्धपातळीवर हाती घेण्यात आले आहे. याच कालावधीत जलपर्णीचे बीज नदीच्या गाळात रुजते आणि नंतर फुटून ते पुढच्यावर्षी उगवते. त्यामुळे हे चक्र थांबविण्यासाठी उपाययोजना हाती घेण्यात आली आहे. केवळ रविवारी काम करून चालणार नाही म्हणून रानजाई संस्थेची 30 ते 40 जणांचे पथक या ठिकाणी येऊन नदीपात्रातील जलपर्णी काढण्याचे काम करीत आहे.
पवना स्वच्छतेचा हा उपक्रम पाहून तळेगाव दाभाडेचे उपनगराध्यक्ष सुनील शेळके यांनी पुढाकार घेऊन नदी तीरावरील 35 गावांचे घाट दत्तक घेऊन स्वच्छता मोहीम राबविण्याचे आश्वासन दिले. मावळ तालुक्यातून नदीच्या पाण्यात घाण मिसळणार नाही, याची दक्षता घेऊ, असे स्पष्ट केले. येत्या 20 ते 21डिसेंबरच्या काला वधीत जलदिंडी पवना नदीच्या स्वच्छ पाण्यातून प्रवास करेल, अशी ग्वाही शेळके यांनी दिली.
पुढील पाच रविवारी मोहीम
गेल्या 19 ते 26 नोव्हेंबरच्या कालावधीत महासाधू मोरया गोसावी, केजुबाई बंधारा, वाल्हेकरवाडी येथे नदीतील जलपर्णी काढण्यात आली आहे. किवळे, चिंचवड, काळेवाडी, पिंपरी, सांगवी, दापोडी येथे ही मोहीम पुढील पाच रविवारी राबवली जाणार आहे, असे संयोजकांकडून स्पष्ट करण्यात आले. या उपक्रमात महापालिकेनेही सहभागी होऊन सहकार्य करावे, अशी अपेक्षा व्यक्त करण्यात येत आहे. उपक्रमात सहभाग नोंदविण्यासाठी प्रदीप वाल्हेकर (9011036360) यांच्याशी संपर्क साधण्याचे आवाहन करण्यात आले आहे.

Post a Comment

 
Top