Add

Add

0

मुंबई (प्रतिनिधी ):- सुप्रसिध्द अभिनेत्री विद्या सिन्हा यांचे आज अल्पशा आजाराने निधन झाले. त्या 72 वर्षांच्या होत्या. हृदय व फुफ्फुसाच्या विकाराने त्रस्त असलेल्या सिन्हा यांच्यावर जुहू येथील खासगी रुग्णालयात उपचार सुरू होते. उपचारादरम्यान त्यांनी अखेरचा श्वास घेतला.
‘छोटी सी बात’, ‘रजनीगंधा’, ‘पती, पत्नी और वो’, ‘तुम्हारे लिए’, ‘सफेद झूठ’, ‘मुक्ती’, ‘सबूत’ अशा गाजलेल्या चित्रपटात झळकलेल्या विद्या सिन्हा यांनी मनोरंजनसृष्टीत स्वत:ची वेगळी ओळख निर्माण केली होती. काव्यांजली, कुल्फी कुमार बाजेवाला, भाभी, बहुरानी, कबूल है, चंद्र नंदिनी या टीव्ही मालिकांमध्येही त्यांनी काम केले होते. ‘कुल्फी कुमार बाजेवाला’ मालिकेतील त्यांची बेबे ही भूमिका विशेष गाजली होती. मधल्या काळात त्या बॉलिवूडपासून दूर होत्या. बर्‍याच वर्षांनी त्या
सलमान खानच्या ‘बॉडीगार्ड’ चित्रपटात दिसल्या होत्या.
मुंबईतील क्रिटीकेअर रुग्णालयात त्यांच्यावर उपचार सुरू होते. हृदयाचा आजार बळावल्याने डॉक्टरांनी त्यांना अँजिओप्लास्टी करण्याचा सल्ला दिला होता. मात्र, त्यांच्या कुटुंबीयांनी अँजिओप्लास्टी करण्यास नकार दिला होता. त्यामुळे त्यांना व्हेंटिलेटरवर ठेवण्यात आले होते.
विद्या सिन्हा यांचे दोन विवाह झाले होते. व्यंकटेश्वर अय्यर यांना घटस्फोट दिल्यानंतर त्यांनी नेताजी भीमराव साळुंखे यांच्याशी दुसरा विवाह केला होता. मात्र, तोही फार काळ टिकला नाही. साळुंखे यांच्या विरोधात त्यांनी मानसिक व शारीरिक छळाची तक्रार दाखल केली होती. त्यामुळे त्या अचानक चर्चेत आल्या होत्या.

Post a Comment

 
Top